GregorioV

SAMPANAW, TALUPAD, BALANGHAY, PULUTONG, TILAP sa Diksiyonaryong Adarna''y may natanaw agad kong nabasa ang salitang  SAMPANAW ang akala ko'y mula sa  ISANG PANANAW o kaya merong taong  MAG-ISANG PUMANAW ngunit hindi, ito'y salin ng rehimyento na merong dalawa o higit pang  TALUPAD o batalyon, na may dalawa o higit pang BALANGHAY  o kompanya, binubuo naman ng dalawa o higit pang  PULUTONG , platoon habang pulutong ay dalawa o higit pang  TILAP  o iskwad, na ito'y binubuo ng pito o higit pang kawal, wikang kasundaluhan limang salitang dagdag aralin sa wikà na magagamit sa maikling kwento't tulâ; sa masasaliksik ko pang ating salitâ ay maganda ngang maibahagi sa madlâ - gregoriovbituinjr. 01.13.2026 * mga salitâ mulâ sa Diksiyonaryong Adarna

BULUGAN AT BUTAKAL Labingwalo Pababa, ang tanong: Barakong baboy , sagot ko dapat Bulugan , subalit ang lumabas Butakal , mayroon palang ganyan salitang  bulugan  at  butakal ay kapwa mga barakong hayop ngunit bulugan ay di lang baboy sa barakong kabayo'y tawag din lalawiganin, wikà ng bayan pinag-isip ng palaisipan may bagong salitang natutunan na magagamit sa panulaan salamat sa pagsagot ng krosword mula sa nabiling pahayagan libangan na, may natutunan pa sa diwa'y ehersisyong talaga - gregoriovbituinjr. 01.13.2026 * krosword mulâ sa pahayagang Abante, Enero 10, 2026, p.7

GREENLAND, BANTANG ISUNOD SA VENEZUELA ayon sa U.S., isusunod na ang Greenland matapos nitong lusubin ang Venezuela isa na namang pinakukulong digmaan nang dahil sa Monroe Doctrine ng Amerika ayon sa mga Kanô mismo, labag ito sa Saligang Batas nila o Konstitusyon wala itong basbas ng kanilang Kongreso tilà si Trump sa pananakop na'y nagumon mga Greenlander mismo'y ayaw magpasakop sa U.S., sila'y mananatiling Greenlander ngunit ang U S. ay may bantang makahayop lalo't sila'y pakialamero't intruder malayò man tayo sa kanila, dapat lang iprotesta ang ganyang pahayag, balakin dapat tutulan ang bantâ nilang digmaan panibagong giyera'y ating tuligsain dapat igalang ang sariling pagpapasya ng mga bansa't katutubong mamamayan dapat umiral ang panlipunang hustisya para sa lahat, kahit bansa'y mahirap man - gregoriovbituinjr. 01.13.2026 * mga ulat ng Enero 13, 2026, mulâ sa mga pahayagang Abante, p.3 at Bulgar, p.5

KU KURA KURAKOT, BA BALAK BALAKYOT (UTAL - ULAT - TULÂ) ka kala kalaban / nitong ating bayan dinastiya't trapong / ka kawa kawatan lalo ang ku kura / ku kura kurakot pagkat mga balak / ba balak balakyot upa upakan na / ang nanda nandambong sa kaban ng bayan, / u ulo'y gugulong paru parusahan / at iku ikulong itong TONGresista / at sina SenaTONG kon kontra kontrakTONG  / ipi ipiit din pa paro parunggit / iparinig man din silang ang dukha kung / la lait laitin tilà mga haring / sa sala salarin li lipol lipulin / na iyang buk buktot na sistema'y bina / binalu baluktot wakasan ang balak / ba balak balakyot nang matigil iyang / ku kura kurakot - gregoriovbituinjr. 01.13.2026

KAYÂ TAYO MAY TULDIK siya ay galít siya'y may gálit baság na ang bote may bâsag ang bote siya ay titíg na titíg kaytindi ng kanyang títig maligayang báti buti't sila na'y batí dito'y ating mawawatas magkakaiba ng bigkas kayâ dapat makata'y batid paano maglagay ng tuldik sa ginamit na salitâ upang mabigkas ng tamà ganyan kahalaga ang tuldik sa taas ng letrang patinig kayâ dapat nating malaman kung paano ilagay iyan kung paano mo sinasabi mabilis, mabagal, mabini - gregoriovbituinjr. 01.12.2026 * litrato mula sa Diksiyonaryong Adarna, p. 952

KURAKOT BA'Y BUWAYA O PATING? walâ pa raw malaking isdang nakukulong walang pating, walang buwaya o balyena itinuring na buwaya ang mandarambong subalit malaking isdâ ang hanap nila ang malaking isdâ ba'y balyena o pating? sila yaong malalaking dapat mahuli? gayong kurakot ay buwaya kung ituring buwayang kurakot, sinisigaw sa rali marahil, mga kurakot din ay buwitre nanginginain ng dugo't pawis ng dukhâ silang kaban ng bayan ang sinasalbahe ay di sinasalba kundi tinutuligsâ  kung hinahanap talaga'y malaking isdâ pagkat siyang ulo o utak ng kurakot baka ang hanap ay buwayang dambuhalà? di lang basta balyena o pating ang sangkot - gregoriovbituinjr. 01.12.2026 * litrato mula sa Editoryal ng pahayagang Pang-Masa, Enero 10, 2026, p.3