Ang mariposa

isang mariposa'y napadikit

tila sa damit nga'y nangunyapit

nangingitlog nga ba itong pilit

at umiiyak na parang paslit

kaysarap masdan ng mariposa

lalo't nakaaaliw sa mata

ang pagpagaspas ng pakpak niya

at kulay na matingkad na pula

kundi man siya napapaindak

buntis kaya siya't manganganak

at sa sinampay nga napasadlak

doon gagawin ang binabalak

mariposa sana'y magtagumpay

sa plano kahit di mapalagay

- gregoriovbituinjr.

Walang iwanan

Walang iwanan

hindi ako tumatakas at nang-iiwan

upang ang sarili ko'y mailigtas lamang

madakip man ako sa anumang labanan

buti ang gayon kaysa nang-iwan sa laban

sa anumang sitwasyon, dapat maging handa

kahit kaharapin pa'y sangkaterbang tingga

upang ipagtanggol ang manggagawa't dukha

at sa dumaratal na sigwa'y sumalunga

walang iwanan sa laban hanggang mamatay

habang tinataguyod ang lipunang pakay

baybayin man ang matatayog na tagaytay

sisirin ang laot o mabaon sa hukay

walang iwanan ay prinsipyong itinaga,

di sa bato, kundi rito sa puso't diwa

- gregoriovbituinjr.

* Nag-selfie ang makatang gala sa painting ng isang kasamang tibak sa dating tanggapan ng BMP sa QC. 

Wala akong konsepto ng sabi nila'y bakasyon

wala akong konsepto ng sabi nila'y bakasyon

kung saan magpapahinga ako't maglilimayon

pagkat nasa isip ko lagi'y pagrerebolusyon

pagkat ayokong masayang lang ang aking panahon

sa bakasyon at di matupad ang atang na misyon

tuloy ang laban at gawaing pag-oorganisa

tuloy-tuloy lang ang layuning dapat maimarka

tuloy lang ang pagpapatupad ng gawaing masa

tuloy ang sa obrero't maralita'y mag-eduka

hanggang sa nilalayon, sila na'y maging kaisa

babawiin ang inagaw nilang tinig at puri

lalo't sanhi ng hirap ay pribadong pag-aari

tatanggalin ang kapritso ng mga naghahari

upang manggagawa't dukha'y maging iisang uri

at lipunang makatao'y kanilang ipagwagi

- gregoriovbituinjr.

Musika ang lagaslas ng tubig

Musika ang lagaslas ng tubig

musika ang lagaslas ng tubig

kaysarap sa taynga pag narinig

awit ng nimpa'y nauulinig

nimpang nais kulungin sa bisig

ang mga isdang naglalayungan

ay masasayang nagsasayawan

nag-uusap pag napapagmasdan

hinggil sa problema'y kalutasan

- gregoriovbituinjr.

Tula sa ika-20 anibersaryo ng pagkamatay ni Ka Popoy Lagman

saktong dalawampung taon na ang nakararaan

nang si Ka Popoy Lagman ay pinaslang sa Diliman

hanggang ngayon, naghahanap pa rin ng katarungan

ang pamilya, pati na kasamahan sa kilusan

mantak mong isipin, dalawang dekada na pala

ng paglulupa't tumanda na kaming aktibista

hustisya'y kaybagal subalit kami'y umaasa

sa kalaunan ay makakamit din ang hustisya

- gregoriovbituinjr. 02.06.2021

Ang mga manggagawang nagpipinta

mabuhay ang mga manggagawang kayod ng kayod

sa trabaho para lang sa kakarampot na sahod

sa gitna man ng pandemya, huwag lang nakatanghod

pinipintahan yaong sa kalawang na'y napudpod

nawa'y makasama namin kayong mapag-aralan

at masuri ang samutsaring isyung panlipunan

masdan bakit sa kabila ng inyong kasipagan

ay may laksang naghihirap at mayamang iilan

- gregoriovbituinjr.

- kuha ng makatang gala sa foot bridge sa kanto ng Quezon Ave. at Sgt. Esguerra St., malapit sa Edsa

Pagwawagayway ng bandila

sa B.M.P., Sanlakas, at M.M.V.A., Mabuhay!

talagang mga bandila ninyo'y nagwawagayway

na pawang nakuhanan ng litratong sabay-sabay

sa ihip ng hangin ay sadyang mababasang tunay

pagpupugay sa inyong mga ipinaglalaban

pagkat tunay kayong may prinsipyo't paninindigan

nawa'y magtagumpay kayo sa mga nasimulan

para sa kagalingan ng bayan at mamamayan

- gregoriovbituinjr.

- kuha ng makatang gala sa isang pagkilos sa UP Diliman, Enero 29, 2021, bago ang oral argument ng Anti-Terror Law sa SC, Feb. 2

Lagaslas

Lagaslas

pakinggan mo ang kanyang lagaslas

habang daloy niya'y minamalas

animo'y musikang nadaranas

na ang puso'y napapabulalas

ng pagsintang sa langit tumagas

- gregoriovbituinjr.

Pagapang-gapang

Pagapang-gapang

anong klaseng pulang nilalang

ang sa lupa'y pagapang-gapang

animo'y munting alupihan

o pulang uod pag minasdan

- gregoriovbituinjr.

Titisan, upos at yosibrik

TITISAN, UPOS AT YOSIBRIK

ilagay ang upos sa titisan

sapagkat iyon ang kailangan

di itapon sa kapaligiran

sapagkat bansa'y di basurahan

kung sa malayo nakatunganga

isiping yosibrik ay magawa

sa plastik na bote ilulungga

ang upos na naglipanang pawa

titisan pag napuno'y ibuhos

sa daspan at gawin ng maayos

ihiwalay ang titis at upos

nang yosibrik ay malikhang lubos

ang yosibrik ay pagtataguyod

ng kalinisang nakalulugod

baka may imbensyong matalisod

nang hibla nito'y makapaglingkod

masdan ang upos na pulos hibla

baka dito'y may magagawa pa

tulad ng lubid mula abaka

tulad ng barong na mula pinya

ang hibla ng upos ay suriin

baka may imbensyong dapat gawin

kaysa sa ilog ito'y anurin

kaysa sa lansangan lang bulukin

huwag hayaang naglilipana

saanman, sa laot, sa kalsada

pagkat upos na'y naging basura

di lang sa bansa, buong mundo pa

bakasakaling may masaliksik

na solusyon sa upos na hindik

halina't tayo nang magyosibrik

dinggin nawa ang munti kong hibik

- gregoriovbituinjr.

Pagtungayaw

Pagtungayaw

"Huwag mo akong mumurahin!

Di mo ako pinapakain!"

sa sinabi niya'y nagdili

nagtanong na lang sa sinabi

pagpapakatao'y nahan na

pag sa kapwa'y nagtungayaw ka?

lohika niya'y mukhang palso

pag tinanong mo nang ganito:

"Pag iyo bang pinapakain

ay pwede mo na ring murahin?"

- gregoriovbituinjr.

- kuhang litrato ng makatang gala habang naghahanda ng almusal

* Unang nalathala sa Taliba ng Maralita, ang opisyal na publikasyon ng pambansang organisasyon ng Kongreso ng Pagkakaisa ng Maralitang Lungsod (KPML), isyu ng Pebrero 1-15, pahina 20.