Tarp na tela

TARP NA TELA

dalawang taal na taga-Pasig

na tangan ang tarpolin na tela

nagsalita sila'y ating dinig

nang midya'y kinapanayam sila

na tinanong ukol sa tarpoling

makakalikasan, ano iyon

di na plastik ang ginamit nila

na parapernalyang pang-eleksyon

kayganda ng katwirang matuwid

kandidato'y makakalikasan

dito pa lang, may mensaheng hatid

kalikasan ay pangalagaan

paninindigan ng kandidato

sa tumitindi nang bagyo't klima

paninindigang para sa mundo

prinsipyadong tindig, makamasa

"Climate Justice Now!" ang panawagan

sa bawat bansa, buong daigdig

na platapormang kanilang tangan

kung saan dapat magkapitbisig

ah, ito'y isa nang pagmumulat

pagkasira ng mundo'y sinuri

sa kanila'y maraming salamat

sana ang line-up nila'y magwagi

- gregoriovbituinjr.

03.04.2022

* litratong kuha ng makatang gala matapos ang forum ng PasigLibre, 03.01.2022

Pagtawid

PAGTAWID

basurera silang kaysipag

na naglilinis ng lansangan

nang tatawid sa lupang patag

natsambahan kong makodakan

kumakaway sa motorista

tila ba pakiusap yaon

na patawirin naman sila

na nagawa ng mga iyon

anong laking pasasalamat

pinagbigyan ng mababait

nakatawid ng anong ingat

kabutihan sa isang saglit

ah, sa mga pagmamasid ko

sa palagiang paglulupa

nasasalubong kong totoo

yaong naglulutangang paksa

tulad ng kanilang pagtawid

na aking nakodakan lamang

may kwento pala silang hatid

na anong saya pag nalaman

- gregoriovbituinjr.

03.04.2022

Sa hagdanan

SA HAGDANAN

aakyatin ko ang kalangitan

ng mga diyos ng kapalaran

upang iprotesta ang kawalan

ng ginhawa nitong taumbayan

bakit para kayong mga bingi

sa hinaing ng kumain dili

nahan kayo sa daing ng api

kundi sa sofa n'yo nawiwili

bakit para kayong mga bulag

gayong sikreto'y ibinubunyag

sinong nagparusa sa lagalag

na dukhang wala namang nilabag

tama lang ibagsak kayong poon

ng salot na kontraktwalisasyon

deregulasyon, pribatisasyon

na pahirap lang sa madla't nasyon

akyatin na ang hagdan ng langit

at ibagsak ang poong kaylupit

upang ang sistemang nasa bingit

ay mapalitan na nating pilit

- gregoriovbituinjr.

03.03.2022

Distansya

DISTANSYA

kami ni misis ay magkasama

di maghiwalay, laging kaisa

maliban kung nasa opisina

dahil magkalayo ng distansya

buti na lang, may selpon na ngayon

at nagkakausap kami roon

long distance man ang tawagang iyon

nagkakatalamitam maghapon

na malayo man ay malapit din

aking diwata'y haharanahin

pakikinggan ang aking awitin

na di naman kuliglig kung dinggin

magkalapit ngunit magkalayo

gaano mang agwat niring puso

pandemya man, tuloy ang pangako

sa sinisinta't tanging kasuyo

- gregoriovbituinjr.

03.03.2022

Manggagawa naman

MANGGAGAWA NAMAN

sigaw namin: Manggagawa Naman!

hiling na para sa kaligtasan

ng uri at bayan, panawagang

tagos sa aming puso't isipan

lalo na't pulos hunyango't trapo

ang kunwa'y nangangako sa tao

gagawin iyon, gagawin ito

pangakong napapako sa dulo

wakasan ang bulok na sistema

ng mga trapo't kapitalista

Manggagawa Naman, aming pasya

kauring lider para sa masa

kaibigan, tayo'y magsibangon

at ito na ang tamang panahon

ang boto sa manggagawa ngayon

ay para sa pagbabagong layon

ibalik ang dignidad ng tao

na winasak ng kapitalismo

obrero'y ipagwaging totoo

sa Senado, at bilang Pangulo

- gregoriovbituinjr.

03.03.2022

Manggagawa, pangulo ng bansa

MANGGAGAWA, PANGULO NG BANSA

isang bus driver si Pangulong Nicolas Maduro

ng bansang Venezuela, tunay na lider-obrero

guro sa primarya ang sa Peru'y kumandidato

at nanalo, siya si Pangulong Pedro Castillo

obrero sa pabrikang metal, lider-unyonista

yaong pangulo ng Brazil na si Lula da Silva

manggagawa rin ang naging Pangulo ng Bolivia

na si Evo Morales, nakatatlong termino na

ipinanalo ng kanilang mamamayang dukha

at ng kapwa nila mahihirap na manggagawa

di trapo, di elitista ang namuno sa bansa

di kapitalistang mapagsamantala sa madla

totoong lider ang nais ng mga mamamayan

na talagang maglilingkod sa madla't buong bayan

sa atin, tumakbo'y manggagawa sa panguluhan

sa katauhan naman ni Ka Leody de Guzman

bayan ay sawa na sa dinastiya't mga trapo

na nanggaling sa iisang pamilya't apelyido

huwag na sa trapo pagkat dukha'y laging dehado

manggagawa naman ang iboto nating pangulo

- gregoriovbituinjr.

03.02.2022

Mga pinaghalawan:

https://www.nbcnews.com/…/nicolas-maduro-path-bus-driver-ve…

https://www.bbc.com/news/world-latin-america-57941309

https://en.wikipedia.org/wiki/Evo_Morales

https://edition.cnn.com/…/…/lula-da-silva-profile/index.html

https://www.youtube.com/watch?v=QSehQ5sbxBs

Basura'y huwag itapon dito

BASURA'Y HUWAG ITAPON DITO

para daw sa pagpapanatili

ng kalinisan sa buong kampus

pagtatapon ng basura'y hindi

sa kung saan lang, dapat matapos

ang gayong pangit na kaasalan

na kung saan-saan nagtatapon

ng basurang di mo na malaman

batid mo sa paskil anong layon

buong pamantasan kung malinis

ang estudyante'y di mandidiri

sa kapaligirang di malinis

dahil lalangawin ka, kadiri

kung basura'y ilagay sa wasto

pamantasa'y kaiga-igaya

sa karunungan upang matuto

ang mga estudyante'y masaya

iyan ang kahulugan ng paskil

kaya 'yung magtatapon kung saan

ay di lang burara kundi sutil

at kadiri ang kaugalian

- gregoriovbituinjr.

03.02.2022

Huwag magyosi

HUWAG MAGYOSI

pininta sa dyip ang "No Smoking!"

at may "Please" pa, aba'y anong galing!

pakiusap na ito't matining

sa mananakay, tao'y nagising

patakaran sa lupang hinirang

nang kapwa pasahero'y igalang

kung may magyosi sa dyip, malamang

baka may magkasakit na lamang

paano pag nagkasakit tayo

biglang hinika, biglang inubo

babayaran ng nagyosing ito?

ang nagkasakit na pasahero?

salamat at tayo'y sinasagip

mula sa bantang pagkakasakit

buti't hininga'y di na sumikip

dahil sa taong yosi ang hirit

may ismoking erya, doon sila

huwag sa dyip o harap ng masa

ito'y pagrespeto ngang talaga

sa pasaherong tulad din nila

- gregoriovbituinjr.

03.02.2022

Kasangga ng manggagawa

KASANGGA NG MANGGAGAWA

kakampi ng trapo o kasangga ng manggagawa?

kakampi ng dilawan o kasangga ng paggawa?

kakampi ba ng gahaman o kasangga ng dukha?

kakampi ba ng kanan o kasangga ng kaliwa?

kakamping kapitalista o kasanggang dalita?

sino bang kakampi at sinong kasangga ng masa

upang tuluyang baguhin ang bulok na sistema

habang ang daigdig ay pinapaikot ng pera

habang kayraming dukha'y patuloy na nagdurusa

pag-aralan ang lipunan at dalang pulitika

bakit hustisya'y pangmayaman, di pantay ang batas

bakit may ilang mayaman, dukha'y laksa, di patas

nais nating lipunang ang palakad ay parehas

ibaba ang presyo ng bilihin, sahod itaas

proseso'y respetuhin, walang basta inuutas

dapat nang magkaroon ng pagbabago sa bayan

baligtarin ang tatsulok, durugin ang gahaman

kaya ang panawagan namin: Manggagawa Naman!

lider-manggagawa ang ilagay sa panguluhan

ang subok na sa pakikibaka'y ipwesto naman

- gregoriovbituinjr.

03.01.2022

Makakalikasan para sa Senado

MAKAKALIKASAN PARA SA SENADO

para sa kalikasan ang dalawa'y tumatakbo

mga environmental advocates silang totoo

halina't tandaan ang pangalang ROY CABONEGRO

at DAVID D'ANGELO, kandidato sa Senado

si Roy Cabonegro ay matagal kong nakasama

sa isyung makakalikasan sa akin humila

Environmental Advocates Students Collective pa

samahan sa iba't ibang pamantasan talaga

si David D'Angelo ay minsan nang napakinggan

nang sa Partido Lakas ng Masa'y naimbitahang

plataporma'y ilahad bilang Senador ng bayan

zoom meeting iyon, tunay siyang makakalikasan

sa pagka-Senador ay atin silang ipagwagi

ang dalawang itong sa kalikasan ay may budhi

at kung maging Senador ay magsisilbing masidhi

sa taumbayan, sa kalikasan, na ating mithi

- gregoriovbituinjr.

03.01.2022

Paglulunsad ng 101 Red Poetry

PAGLULUNSAD NG 101 RED POETRY

ito'y bunsod ng tungkulin

ng makatang aktibista

na ating payayabungin

ang pulang literatura

pulang tula, red poetry

panitikang proletaryo

na sa madla nagsisilbi

tungong asam ng obrero

kandidato'y ipagwagi

sa landas ng kasaysayan

kandidatong makauri

si Ka Leody de Guzman

bilang pangulo ng bansa;

ang kanyang bise pangulo

si Ka Walden Bello na nga

sila'y ating ipanalo

ihalal nating totoo

pati buong line-up nila

at si Ka Luke Espiritu

para senador ng masa

ito ang aming layunin

na idadaan sa tula

itong aming adhikaing

lipunan ng manggagawa

at ngayon inilulunsad

pulang tula, red poetry

mga tulang ilalahad

para kina Ka Leody

tara, mag-ambag ng tula

upang ating payabungin

panitikang manggagawa

na ating pauunlarin

- gregoriovbituinjr.

03.01.2022

Poetry reading schedule:

March 21 - World Poetry Day

April 2 - Balagtas birthday

May 1 - International Labor Day