Pagkasaid

PAGKASAID

nasasaid din ba ang haraya

kaya minsan ay di makatula?

may panahon ding nakatulala

sa kawalan, walang bungang diwa?

madalas tumitig sa kisame

butiki'y nakitang nagbabate

nang biglang dumapo'y kalapati

naroong kasama'y kulasisi

ano na ngayon ang iisipin

kung ang utak ay di pipigain

haraya'y wala sa toreng garing

wala rin sa pusaling maitim

baka dapat magpahinga muna

pagkat diwa't katawa'y pagod na

baka naman bukas ng umaga

haraya'y bumalik, nagdurusa

- gregoriovbituinjr.

07.17.2023

Bawat tula ko'y piraso ng aking buto

BAWAT TULA KO'Y PIRASO NG AKING BUTO

bawat tula ko'y piraso ng aking buto

bawat katha'y tipak ng buong pagkatao

ang tula ko'y ako, ng aking pagkaako

sapul pagkabata hanggang aking pagyao

sumasagad sa buto, bungo'y nagdurugo

maitula lang ang nadaramang siphayo

bayo sa dibdib ay damang nagpapadungo

mga pilay sana'y gumaling na't maglaho

nang minsang madapa, nadama'y napilantod

animo'y nadurog ang aking mga tuhod

tila apektado rin ang aking gulugod

pati bawat kataga, saknong at taludtod

nadama kong napilayan akong matindi 

kaya pati sa pagkatha'y di mapakali

puso't diwa'y nayanig, sa dusa'y sakbibi

tulad ng pagtulang lumbay lagi ang saksi

patuloy akong kakatha ng tugma't sukat

may pilay man yaring pulso sa pagsusulat

sakaling tula ko'y binasa't dinalumat

tangi kong masasabi'y salamat sa lahat

- gregoriovbituinjr.

07.16.2023

Pag-amin

PAG-AMIN

inaamin ko, pangit talaga akong tumula

kaya mga nagbabasa't nagla-like ay bihira

di tulad ni makatang Glen at iba pang makata

madalas tumula't kaygaling talagang kumatha

minsan ngang magkita kami ni kasamang Marcelo

tanong niya'y bakit di nila-like ng kolektibo

ang mga tula ko, ayos lang iyon, ang sabi ko

ang mahalaga, sa pagkilos ay patuloy tayo

sinabi ni Pilosopo Tasyo'y gamit ko ngayon

na habang kausap si Ibarra'y nagsulat noon

nang di raw para sa kanyang mga kahenerasyon

sinulat sa baybayin, babasahin daw paglaon

mahalaga ngayon, sarili'y bigyan ng halaga

humaharap sa mundo ng taasnoo talaga

kahit tula ko'y tinuturing nilang walang kwenta

bagamat bawat tula'y tulay ko tungo sa masa

kaya pinagtutuunan ko na lang ay mensahe

para sa uri, para sa bayan, di pansarili

tuloy sa pagkatha kahit pa nila isantabi

o isuka ang aking tula, anong aking paki

napapangitan man sila sa aking tugma't sukat

ito ang aking paraang magbahagi sa lahat

bihira mang may mag-like, at tula ko'y inaalat

ay pinagbubutihan ko pa rin ang pagsusulat

- gregoriovbituinjr.

07.16.2023

Ang sosyalismo ay dagat

ANG SOSYALISMO AY DAGAT

anang isang kasama, ang sosyalismo ay dagat

walang nagmamay-ari, nakikinabang ay lahat

iyan din ang pangarap ko't adhika sa pagmulat

sa kapwa, uri't bayan, lasa man ay tubig-alat

di tulad ngayon, inangkin na ng mga kuhila

sa ngalan ng tubo, ang laksang bagay, isla't lupa

silang di nagbabayad ng tamang lakas-paggawa

at nagsasamantala sa obrero't maralita

sinong nais magmay-ari ng buong karagatan

marahil wala, pagkat di nila ito matirhan

baka naman may nagnanais na ito'y bakuran

upang yamang dagat ay kanilang masolo naman

sinong gustong may nagmamay-aring iilang tao

sa isang malawak na lupa dahil sa titulo

habang katutubo'y nakatira na noon dito

inagawan sila ng lupa ng mapang-abuso

mga pribilehiyo'y nasa mga nag-aari

yaman ng lipuna'y nasa burgesya, hari't pari

inapi ang tinuringang nasa mababang uri

ugat nga ng kahirapa'y pribadong pag-aari

kaya dapat nating ipagwagi ang sosyalismo

at itayo ang lipunang talagang makatao

di na korporasyon ang mananaig na totoo

kundi kolektibong pagkilos ng uring obrero

- gregoriovbituinjr.

07.16.2023

* litrato mula sa google

Payak na pamumuhay

PAYAK NA PAMUMUHAY

payak lamang ang buhay naming tibak na Spartan

lalo't patuloy na nakikibaka sa lansangan

talbos ng kangkong at tuyong hawot man itong ulam

pinapapak man ng lamok, at banig ang higaan

kaming tibak na Spartan ay nariritong kusa

upang depensahan ang dukha't uring manggagawa

laban sa mga gahaman at mapang-aping linta

na nakikinabang sa dugo't pawis ng paggawa

patuloy naming hinahasa ang aming kampilan

at isipan at pinag-aaralan ang lipunan

bakit laksa'y naghihirap at mayama'y iilan

paano mababago ang bulok na kalagayan

sariling kaginhawahan ay di namin adhika

kaya pagpapayaman ay di namin ginagawa

nais naming dukha'y sabay-sabay na guminhawa

kaya aming itatayo'y lipunang manggagawa

- gregoriovbituinjr.

07.15.2023

KWF, gawing opisyal na tagasalin ng batas

KWF, GAWING OPISYAL NA TAGASALIN NG BATAS

gawing opisyal na tagasalin ng batas

ang ahensyang pangwika, at dapat iatas

doon sa Komisyon sa Wikang Filipino

mga batas sa Ingles, isa-Filipino

upang di maagrabyado ang mga dukha,

pesante, vendor, katutubo, manggagawa,

mangingisda, kababaihan, kabataan

bawat batas na apektado'y mamamayan

halimbawa na lamang ang UDHA at IPRA

na nasa Ingles, di maunawa ng masa

kung isinalin iyan sa wikang sarili

madaling maunawa, sa masa'y may silbi

dapat maisulat ang panukalang ito

at mapag-usapan sa Kongreso't Senado

lagdaan ng Pangulo upang maging batas

daan ito upang lipuna’y maging patas

- gregoriovbituinjr.

07.09.2023

* UDHA - Urban Development and Housing Act of 1992, Republic Act No. 7279

*IPRA - Indigenous Peoples' Rights Act of 1997, Republic Act No. 8371

Nais kong itanim ang tula

NAIS KONG ITANIM ANG TULA

nais kong itanim ang tula

tulad ng bawang at sibuyas

kapara'y magagandang punla

na sa puso'y nagpapalakas

huhukay ng tatamnang lupa

binhi'y ilalagay sa butas

at maayos na ihahanda

kakamadahing patas-patas

lalagyan ng mga pataba

ang mga katagang nawatas

ang lulutang na talinghaga

ay alipatong nagdiringas

daramhin ang bawat salita

na sa gunita'y di lilipas

ulanin at arawing sadya

tutubong sabay at parehas

magbunga man ng luha't tuwa

pipiliin ang mapipitas

aanihin ang bagong tula

na alay sa magandang bukas

- gregoriovbituinjr.

07.09.2023

* litrato'y kuha ng makatang gala

Sipnayan

SIPNAYAN

sineseryoso ko pa ring / pag-aralan ang sipnayan

na naunsyami nga noong / umalis sa pamantasan

upang sadyang pag-aralan / ang bayan, uri't lipunan

prinsipyo'y isinabuhay / bilang tibak na Spartan

binabasa-basa'y aklat, / inuunawang mabuti

pag may mga libreng oras / o kaya'y di mapakali

sipnayan sana'y natapos / subalit di nagsisisi

at ngayon binabalikan / ang kalkulus at dyometri

habang patuloy pa naman / sa paglilingkod sa madla

kasama'y mga kauring / manggagawa't maralita

tuloy ang pakikibaka't / tinutupad ang adhika

habang sa paksang sipnayan / ang sarili'y hinahasa

kurso kong B.S. Math noon / ay talagang di natapos

pagkat napapag-usapa'y / lagay na kalunos-lunos

ng dalita't manggagawa / kaya nagdesisyong lubos

umalis ng pamantasan, / paglingkuran ang hikahos

pagkat baka balang araw / ay mayroong maitulong

bagong sistema'y mabuo / sa tulong ng sipnayanon

paano bang kaunlaran / ay talagang maisulong

kung sakaling manalo na / ang asam na rebolusyon

ngunit di pa naman huli't / makakapag-aral muli

pagkat misyon at panahon / ay kayang ihati-hati

pag-aralan ang sipnayan / at paglingkuran ang uri

hanggang lipunang pangarap / ay ating maipagwagi

- gregoriovbituinjr.

07.05.2023

* sipnayan - math

Pagtula

PAGTULA

minsan, ayoko na ring tumula

pagkat ito na'y nakakasawa?

aba, aba, ang nagmamakata

ay titigil na ba sa pagkatha?

kapara ko ba'y sangkilong bigas

na nagtampo't wala nang mawatas

o kapara'y dahon ng bayabas

na di magawang maipanglanggas

balak, daniw, tula, binalaybay

kawatasan, rawitdawit, siday

anlong, dalit, diona, salaysay

o tanaga ang tulay sa buhay

ang tula ba'y kaya kong layuan

o panahon lang ng alinlangan

ah, pagtula'y di ko maiiwan

dama ma'y parang nasa kawalan

- gregoriovbituinjr.

07.05.2023

Salamisim

SALAMISIM

nais kitang puntahan

sa yungib ng kawalan

bakit lagi ka riyan

sa putik at karimlan?

nais kitang makita

at kukumustahin ka

agila ka pa rin ba?

o isa ka nang maya?

madalas ka raw lugmok

at walang maisuksok?

ginhawa'y di maarok

sa trabahong pinasok?

kahapon ay kahapon

iba na ang panahon

kaisa ka sa layon

kaya kita'y magtulong

lalaban tayong sabay

sa mga tuso't sinsay

sa apoy maglalantay

ang kamao't palagay

pahalikin sa lupa

ang gahamang kuhila

at iligtas ang dukha

sa palamara't linta

- gregoriovbituinjr.

07.01.2023

Nilay sa unang araw ng Hulyo

NILAY SA UNANG ARAW NG HULYO

di ko pa batid noon ang landas kong tatahakin

kung ang maging inhinyero ba'y aking kakayanin

o maging sipnayanon kung aral ay pagbutihin

hanggang mapasok ako sa pahayagang pangkampus

at pagsusulat na ang kinahiligan kong lubos

mula sa numero'y sa titik na nakipagtuos

sa pahayagang pangkampus naman naimbitahan

upang maging tibak at pag-aralan ang lipunan

nagbago ang lahat nang lumabas ng pamantasan

hanggang maging aktibistang Spartan at namuhay

ng matatag habang prinsipyo'y tinanganang tunay

sa uri't sa bayan, ang iwing buhay na'y inalay

anong kahulugan ng buhay, saan patutungo

anong katuturan ng butil ng pawis at dugo

upang kamtin ang mga pangarap at di gumuho

marahil panahon ko'y di pa naman nagagahol

patuloy akong kakatha't masa'y ipagtatanggol

at gagampanan kong buong husay ang bawat tungkol

- gregoriovbituininjr.

07.01.2023

* sipnayan - math; sipnayanon - mathematician