Ang nabili kong aklat

ANG NABILI KONG AKLAT

sa pamagat pa lang ako na'y nahalina

sa nakitang librong nabili ko kagabi

"50 Greatest Short Stories" na'y mababasa

marahil isang kwento muna bawat gabi

nasa wikang Ingles ang maiikling kwento

tanda ko pa nga, mayroon din tayo niyan

librong "Dalawampu't Limang Maikling Kwento"

na kung hahanapin, baka nasa hiraman

dalawampu't limang sikat na manunulat

na nasa pandaigdigang literatura

iba't ibang pinanggalingan nilang sukat

Briton, U.S, Irish, Pranses, Ruso, Canada

sa Europa't U.S. binabasa marahil

kaya wala pang Asyanong may-akda rito

ngunit awtor na Pinoy ay di mapipigil

na sumikat din sa kanyang Ingles na kwento

tigalawang kwento silang mga may-akda

sa "50 Greatest Short Stories" na nabili

inspirasyon sila sa ilan kong pagkatha

sa pagbasa ng akda nila'y nawiwili

- gregoriovbituinjr.

04.05.2024

Talaan ng 25 awtor sa nasabing aklat:

Anton Chekov

Charles Dickens

Katherine Mansfield

Guy de Maupassant

F. Scott Fitzgerald

H. Rider Haggard

O. Henry

Rudyard Kipling

W. W. Jacobs

Virginia Woolf

D. H. Laurence

Saki

Jerome K. Jerome

H. G. Wells

Kate Chopin

Ambroce Bierce

Jack London

Edgar Allan Poe

Stephen Leacock

James Joyce

Bram Stroker

Joseph Conrad

M. R. James

W. Somerset Maugham

R. L. Stevenson

Chess Master Nicolas, 11, pipiga ng utak

CHESS MASTER NICOLAS, 11, PIPIGA NG UTAK

muling makikipagpigaan ng utak

si Nika Juris Nicolas na sasabak

sa torneyong World Cadet Rapid and Blitz Chess

Championship sa bansang Albania, sa Durres

si Nika Nicolas, edad labing-isa

pinakabatang National Chess Master na

ay nagsimulang mag-chess noong pandemic

nakamit na medalya'y namumutiktik: 

naging Pasig City Athlete Scholar na

hanggang naging National Youth Champion siya

tinanghal din siyang Asian Youth medalist

hanggang naging Eastern Asia youth medalist

tinanghal din siyang Batang Pinoy Champion

na kapuri-puri talaga paglaon

hanggang maging Woman Candidate FIDE Master

ngayon nga siya'y Woman National Master

pagpupugay kay Nika Juris Nicolas

sa kanyang talento sa larong parehas

galingan mo pa sa pigaan ng utak

sa larong chess, pangalan mo na'y tatatak

- gregoriovbituinjr.

04.04.2024

* ulat mula sa pahayagang Abante, Abril 4, 2024, pahina 11

Pagkatha sa madaling araw

PAGKATHA SA MADALING ARAW

ikaapat ng madaling araw na'y nagigising

sapagkat iihi sa kabila ng mga dingding

o kaya'y sa kasilyas ngunit di na makahimbing

habang asawa'y humihilik pa ng anong lambing

pagkabukas ng ilaw, agad makikita'y papel

o kwaderno't haharap doon matapos dyuminggel

kakathain ang tunggalian ng demonyo't anghel

demonyo'y naghaharing uri't anghel na di taksil

o marahil naman tititig muli sa kisame

bakit patuloy na nakikibaka ang babae

paano dinala ng kalapati ang mensahe

bakit may tiki-tiki para sa mga bulate

malinaw pa ba ang bungang-tulog o panaginip

na isang manggagawa ang sa nalunod sumagip

na isang magsasaka ang sa palay ay tumahip

na isang makata ang may kung anong nalilirip

- gregoriovbituinjr.

04.04.2024

Ang paskil

ANG PASKIL

habang nakasakay / sa dyip ay nakita
ang paskil sa gitnang / isla ng lansangan
nalitratuhan ko / sa selpon kamera

may pagkilos noon / ang mga babae
pagkat araw iyon / ng kababaihan
ako'y nakiisa't / lumahok sa rali

Abante Babae / yaong nakasulat
bagong samahan ba / yaong naitatag
o isang paraan / na masa'y mamulat

ngayon nga'y patuloy / sa pinapangarap
na sistemang bulok / ay ating mawaksi
at ginhawa'y damhin / ng kapwa mahirap

maitayo natin / ang bagong sistema
at isang lipunang / makataong tunay
na ang mamumuno'y / manggagawa't masa

habang nasa dyip nga'y / aking nalilirip
darating ang araw / masa'y magwawagi
kaya magsikilos, / at huwag mainip

- gregoriovbituinjr.
04.03.2024

* litratong kuha ng makatang gala habang nasa España, Marso 8, 2024

O, kay-init ngayon ng panahon

O, KAY-INIT NGAYON NG PANAHON

O, kay-init ngayon ng panahon

tila katawan ko'y namimitig

para bang nasa loob ng kahon

mainit din kaya ang pag-ibig

konti pa lang ang aking naipon

sana'y di pa sa akin manlamig

ang aking diwatang naroroon

sa lugar na palaging malamig

magpatuloy lamang sa pagsuyo

kahit panahon ng kainitan

baka kung pag-ibig ay maglaho

pagsintang kaylamig ang dahilan

panahon man ay napakainit

patuloy pa rin tayong magmahal

kahit sa pawis na'y nanlalagkit

pag-ibig natin sana'y magtagal

- gregoriovbituinjr.

04.03.2024

Dagitab

DAGITAB

bagamat dagitab ay nabasa ko noon

at nababanggit din sa radyo't telebisyon

sa isang krosword ay nakita ko paglaon

na magagawan ko lamang ng tula ngayon

ang tawag nga sa bombilya'y ilaw-dagitab

sa palaisipan nama'y aking nasagap

sa Una Pababa, tanong: elektrisidad

na lumabas na kahulugan nga'y dagitab

ito marahil ay salita nating luma

muling lumitaw, napapaunlad ang wika

kaya ngayon, ito'y ginamit ko sa tula

bilang pagpapayabong sa sariling wika

palaisipan talaga'y malaking silbi

na lumang kataga'y nahuhugot maigi

kaya ang dagitab sakali mang masabi

tinatalakay ay may ugnay sa kuryente

- gregoriovbituinjr.

04.03.2024

Inadobong isda

INADOBONG ISDA

daing at galunggong

bawang at sibuyas

may toyo pa't suka

lutong inadobo

dapat lang magluto

pag may iluluto

lalo't nagugutom

at nasisiphayo

nang may maiulam

sa kinagabihan

upang mga anak

ay di malipasan

inadobong isda

sa toyo at suka

nang dama'y ginhawa't

mabusog na sadya

aking ihahain

sa hapag-kainan

itong inadobong

kaysarap na ulam

katoto't kumpare

tara nang kumain

lalo't gumagabi

at nang di gutumin

- gregoriovbituinjr.

04.02.2024

Bakit?

BAKIT?

dapat kong isulat kung bakit

ngayon ay di ako palagay

mga alimangong may sipit

ay nakasusugat ngang tunay

bakit ba ipinagkakait

ang karapatang dapat taglay

mula pagkasilang ng paslit

hanggang sa tumanda't mamatay

karapatang dapat igiit

ipaglaban ng buong husay

katarungang dapat makamit

at dapat na ipagtagumpay

sa uhaw nitong nagigipit

tubig ang marapat ibigay

upang di tayo magkasakit

di agad humantong sa hukay

napag-isip-isip kong saglit

bakit di ako mapalagay

nais kong abutin ang langit

na di alam saan sasakay

- gregoriovbituinjr.

04.02.2024

Sa kaarawan ni Utol Bunso

SA KAARAWAN NI UTOL BUNSO

bunso, maligayang kaarawan

nawa'y hindi ka nagkakasakit

at laging malusog ang katawan

nawa'y manatili kang mabait

birthday sa Unang Araw ng Abril

payo sa iyo'y magpakatatag

sa iyo'y wala lang ang hilahil

kaya dama mo'y laging panatag

nareresolba ang suliranin

dahil mana ka sa ating ina

matalino't aasahan natin

tulad ng ating butihing ama

pagbati muli ng Happy Birthday

handog ko sa iyong tula'y tulay

upang palagi ka pang mag-birthday

sa iyo, si kuya'y nagpupugay

- gregoriovbituinjr.

04.02.2024

* litratong kuha ng makatang gala sa Gateway, Cubao, Abril 1, 2024

Sa ika-236 kaarawan ni Balagtas

SA IKA-236 KAARAWAN NI BALAGTAS

ako'y taospusong nagpupugay

sa dakilang sisne ng Panginay

sa kanyang kaarawan, mabuhay!

sa kanya'y tula ang aking alay

pawang walang kamatayang obra

ang nasa akin ay akda niya

una'y itong Florante at Laura

ikalwa'y Orosman at Zafira

salamat, O, Francisco Balagtas

inspirasyon ka sa nilalandas

tungo sa nasang lipunang patas

at asam na sistemang parehas

mabuhay ka, dakilang makata

kaya tula'y aking kinakatha

na madalas ay alay sa madla

lalo na sa dukha't manggagawa

- gregoriovbituinjr.

04.02.2024

* Francisco Balagtas (Abril 2, 1788 - Pebrero 20, 1862)

Pagbabasa

PAGBABASA

di lamang kabataan ang dapat magbasa

upang mabatid ang lagay ng bansa't masa

di lamang estudyante ang dapat magbasa

upang sa pagsusulit sila'y makapasa

kahit kami mang nasa panahong tigulang

ang pagbabasa na'y bisyo't naging libangan

uugod-ugod man o nasa hustong gulang

ang pagbabasa'y pandagdag sa kaalaman

sa umaga'y bibili na agad ng dyaryo

upang mabatid ang napapanahong isyu

sa hapon nama'y magbabasa na ng libro

kahit takipsilim pa ang abutin nito

hihintayin ko pa ba ang mga bubuyog

na dumapo sa rosas upang makapupog

o magbabasa hanggang araw ko'y lumubog

kapara'y nobelang sa puso'y makadurog

pagbabasa marahil ang bisyo kong tunay

kaysa manigarilyo o kaya'y tumagay

sa pagbabasa man ay nakapaglalakbay

nagagalugad ang lugar na makukulay

- gregoriovbituinjr.

04.01.2024