Hikab sa lamay

HIKAB SA LAMAY

ramdam ko na ang antok, naghikab 

ngunit di pa oras magpahinga 

dapat pang asikasuhing ganap 

ang kamag-anakan at bisita 

nakadalawang hikab na ako

ay, dapat nang magpahingang tunay

sa tula ako nagpasaklolo

na siyang sa akin umalalay

pag mga bisita'y nag-uwian

maglilinis muna ng paligid

ipasok ang pinggan, kanin, ulam

saka bintana't pinto'y ipinid

at sa mahabang bangko'y humiga

mga mata'y marahang ipikit

habang sa mahal nangungulila

ay matutulog ng ilang saglit

- gregoriovbituinjr.

04.16.2024

12 at 17

12 AT 17

Maikling sanaysay at tula ni Gregorio V. Bituin Jr.

Si Dad ang panlima at si Tiyo Mado ang pang-anim sa magkakapatid. Sila rin ang talagang close. Nang lumuwas ng Maynila si Dad noong 1960s upang mag-aral at magtrabaho, kinuha niya si Tiyo Mado upang makapag-aral din at ipinasok niya ng trabaho sa pinapasukan ni Dad. Sa FEATI University, kung saan doon din ako nagkolehiyo, nakita nina Dad at Tiyo Mado ang kanilang napangasawa.

Gayunman, may naikwento ang aking kapatid, habang kausap namin ang aming pamangkin.

Birthday ni Tiyo Mado, na nakababatang kapatid ni Dad, tuwing Abril 17. Namatay siya noong nakaraang taon, petsang Nobyenbre 12, limang araw bago mag-birthday si Dad.

Birthday naman ni Dad tuwing Nobyembre 17. Namatay siya nitong Abril 12, limang araw bago mag-birthday si Tiyo Mado.

Pareho pala silang isinilang ng petsa 17 at namatay ng petsa 12. Usapan nga ay parang nagsunduan ang dalawa, na talaga namang magkalapit o close na magkapatid.

Limang araw ang pagitan ng numero ng petsa ng pagkasilang at kamatayan - ang 5 bilang prime number.

Hindi naman ako naniniwala sa numerology bagamat BS Math ang aking kurso sa kolehiyo. Gayunman, ikinwento ko lang ang naikwento sa akin.

Maganda rin naman ang numero ng mga petsa na isa ay prime number - ang 17. At pag in-add mo ang 12 at 17, ang sum ay 29 na isa ring prime number, o tanging sa 1 lang ito maidi-divide. Ang 5, 17, at 29, ay prime number, at gansal din o odd number.

Bagamat ang 12 dahil even number ay hindi naman prime number, dahil divisible by 2, 3, 4, at 6, bukod sa 1 at 12.

Kumatha ako ng tula hinggil sa naikwentong ito.

12 AT 17

dalawang mumero ang tila pinagtiyap

nina tiyo't Dad na magkapatid ngang ganap

Tiyo Mado'y sinilang, Abril Disisyete

namayapa siya'y petsa Nobyembre Dose

sinilang si Dad ng Nobyembre Disisyete

namayapa siya sa petsang Abril Dose

magkapatid silang alam kong sanggang dikit

na sa isa't isa'y talagang magkalapit

kina Tito Mado't Dad, ako'y nagpupugay

ang kanilang pagkawala'y nagbigay-lumbay

mga payo nila'y lagi kong tatandaan

aral nilang pamana'y di malilimutan

maraming salamat po sa inyong dalawa

at pagsasama natin noon ay kaysaya

04.15.2024

* litrato ng tsart mula sa google

Pangarap

PANGARAP

pinagsisikapan kong marating

ang lipunang asam ng magiting

tulad ngayon, kahit bagong gising

at ang maybahay ko'y naglalambing

paanong ginhawa'y malalasap

ng pinaglalabang mahihirap

paanong layon ay maging ganap

nang kamtin ang lipunang pangarap

tuloy ang laban ng aktibista

giya ang mga isyu ng masa

patuloy kaming nakikibaka

para sa karapata't hustisya

babaguhin itong nakagisnang

bayan ng tiwali't kabulukan

itayo'y makataong lipunang

sa masa'y dapat may kabuluhan

- gregoriovbituinjr.

04.15.2024    

Pagninilay

PAGNINILAY

isusulat ko ang anumang naninilay

ilalarawan ang anumang makukulay

kumakatha pa rin kahit di mapalagay

sa kasalukuyan man ay tigib ng lumbay

akdain din ang masaya o isyung dala

bilang abang makata, editor, kwentista

bilang mananalaysay ng mga historya

bilang tibak na Spartan, limgkod ng masa

di ko naman hanap ang lugar na tahimik

gabing pusikit man o araw na'y tumirik

kahit maingay, handa ang aking panitik

magsusulat akong walang patumpik-tumpik

ang mahalaga palagi'y may sasabihin

at masisimulan mo na ang aakdain

- gregoriovbituinjr.

04.14.2024

Kamatayan

KAMATAYAN

ang lahat ng tao'y mamamatay

isang katotohanan ng buhay

gayunman, tayo'y tigib ng lumbay

pag mahal sa buhay na'y nawalay

paano ba agad matatanggap

kung may tutuparin pang pangarap

kung sa sakuna'y nawalang iglap

o kung sa ospital na'y naghirap

ang mahalaga, noong buhay pa

noong kayo pa'y nagkakasama

ay nagsikap, nagmamahalan na

at may respeto sa bawat isa

kamataya'y di maiiwasan

masasabing buhay nga ay ganyan

marahil tanging pag-ibig lamang

ang mapapabaon sa libingan

- gregoriovbituinjr.

04.14.2024

* litrato mula sa app game na Word Connect

Takipsilim

TAKIPSILIM

sumilang ang araw sa bansa, bayan at kanugnog
sa daigdig ay sisikat ng pagkatayog-tayog
habang ilang oras lamang ito na'y papalubog
at bukas ay sisikat muli ng buong pag-irog

tulad din ng buhay, may pagsikat at takipsilim
tulad din ng pagkawala ng buhay na taimtim
tulad kong isang bubuyog na sa rosal sumimsim
sa bawat umaga't tanghali, sasapit ang dilim

ang paglubog ng araw ay matalinghaga minsan
pagkat nauugnay bilang tanda ng kamatayan
ngunit paano tatanggapin ang katotohanan
na mahal mo'y lumubog na ang araw nang tuluyan

nadarama ko pa rin ang kabutihan ni Ama
sa aming magkakapatid na inaruga niya
ang pagsapit ng takipsilim ay may ibinunga
na magkakapatid, pinakita'y pagkakaisa

- gregoriovbituinjr.
04.13.2024

Bukangliwayway

BUKANGLIWAYWAY

ang pagkasilang ay kapara ng bukangliwayway

ating magulang ay kaysaya't isang bagong araw

pag-uha ng sanggol ay tanda ng pag-asa't buhay

pag narinig ng iba'y palakpak at di palahaw

magsasaka'y gising na bago magbukangliwayway

paparoon na sa bukid kasama ng kalabaw

mag-aararo at magtatanim ng gintong palay

hanggang mag-uhay, pati gulay, okra, bataw, sitaw

manggagawa'y gising na sa pagbubukangliwayway

papasok sa trabaho, may panggabi, may pang-araw

sa pabrika'y binenta ang lakas-paggawang tunay

sa karampot na sahod ang metal ay tinutunaw

O, bukangliwayway, sa bawat aking pagninilay

matapos ang takipsilim, ikaw nama'y lilitaw

upang sambayanan ay gabayan, tula ko'y tulay

sa masa, tanda ng pag-asa't hustisya ay ikaw

- gregoriovbituinjr.

04.13.2024

Tula kay Dad

TULA KAY DAD

alas-diyes disisiyete kaninang umaga

nang mabalitaan namin ang pagkawala niya

nagyakapan kami ni misis, may luha sa mata

gayunman, tinanggap na naming si Dad ay wala na

maraming salamat, Dad, sa inyong pagpapalaki

sa amin, ikaw ay aming ipinagmamalaki

binigyan ng edukasyon, inalagaan kami

at tiniyak na maging mamamayang mabubuti

buti't nagisnan ninyo ang kasal namin ni Libay

iyon ay isa sa ikinatuwa ninyong tunay

pag inyong kaarawan, tula ang tangi kong tulay

upang sadyang amin kayong mapasaya ni Inay

sa pagkawala ninyo'y tula pa rin itong lahad

hanggang sa muling pagkikita, pahinga ka na, Dad

- gregoriovbituinjr.

04.12.2024

Ang patalastas na ito'y nilabas bago magtanghali sa pesbuk ng inyong abang lingkod.

Kati sa paa

KATI SA PAA

minsan, aralin ding kati ay di kamutin

upang di naman magsugat ang balat natin

kaya ang kati ay talagang titiisin

kaysa ginagawa ikaw pa'y abalahin

lalo't nakasapatos, paa mo'y makati

nakatayo ka pa't siksikan sa LRT

tiis-tiis lang, malayo pa ang biyahe

katabi mo pa'y kaibigang binibini

diyaheng maghubad kung merong alipunga

huwag hubarin ang medyas, sa LRT pa

baka umalingasaw ang amoy ng paa

o kaya'y lumala na ang iyong eksema

minsan nga, kakagatin kang bigla ng langgam

ay babalewalain ang sagpang ng guyam

iyang kati pang tiyak namang mapaparam

kaya huwag mo na itong ipagdaramdam

- gregoriovbituinjr.

04.12.2024

Paalala sa kubeta

PAALALA SA KUBETA

paalala'y kaytagal na

sa pinasok na kubeta

sa opisina, kantina,

retawran at kung saan pa

kubeta'y huwag iiwang

marumi't makalat naman

ang inidoro'y buhusan

huwag burara sa ganyan

may susunod pang gagamit

kaya huwag nang makulit

iwan mo iyong malinis

upang sila'y di mainis

kung sumunod ka, salamat

tao kang talagang mulat

- gregoriovbituinjr.

04.12.2024

Salin wika sa LRT2

SALIN WIKA SA LRT 2

minsang sumakay sa Cubao ng LRT2 

na balak bumaba sa estasyon sa Recto

paskil sa tren ay kinunan ko ng litrato

Ingles ay sinalin sa wikang Filipino

"Keep hands away from the door edge."

"Huwag ilagay ang kamay sa gilid ng pinto."

"Do not lean on train doors."

"Huwag sumandal sa pinto ng tren."

"Emergency brake and door open handle."

"Pangkagipitang preno at tatangnan ng pinto."

"Break cover, turn handle to apply brake..."

"Basagin ang takip, pihitin ang tatangnan para sa preno..."

"...and unlock door in emergency."

"...at para mabuksan ang pinto sa sandali ng kagipitan."

"Emergency use only."

"Gamitin lamang sa sandali ng kagipitan."

"Penalty for improper use."

"May parusa sa hindi wastong paggamit."

maraming salamat sa wastong pagsasalin

na kauna-unawa habang sakay sa tren

pag nabasa ng masa'y talagang susundin

na nasa wikang pambansang talagang atin

- gregoriovbituinjr.

04.11.2024