Ginahasa ng parak

GINAHASA NG  PARAK

isang babae ang pinagsamantalahan

ng isang pulis, ito na'y dinisarmahan

at tinanggalan ng tsapa, mabuti na lang

krimeng nagawa'y dapat niyang panagutan

isa pa naman siyang alagad ng batas

sa pakikitungo sa kapwa'y di parehas

anong nasok sa isip at naging marahas

nang dahil sa kalibugan ay naging hudas

sapilitan daw na pinainom ng droga

ang babae at sa isang bukid dinala

at doon hinalay ang kawawang biktima

ngayon, nasa ospital nang dahil sa trauma

dininig daw ay kasong administratibo

laban sa suspek, bakit ganoon ang kaso?

dapat kasong kriminal ang isampa rito

pagkat nanggahasa ang suspek, krimen ito

dahil ba siya'y pulis na may sinasabi?

parak na parang lumalapa lang ng karne

dapat lang managot ang pulis na salbahe

at bigyang hustisya ang kawawang babae

- gregoriovbituinjr.

02.05.2025

* ulat mula sa pahayagang Abante Tonite, Pebrero 4, 2025, tampok na balita (headline) at pahina 2

Ang punong apalit

ANG PUNONG APALIT

Labing-isa Pahalang - ang tanong:

Puno na ginagawang pabango

Apalit ang lumabas na tugon

na kapangalan ng bayan ito

sa Pampanga, may bayang Apalit

baka doon iyon pinangalan

pagkat kayraming punong apalit

na kinabuhay ng mamamayan

tulad ng Calumpit sa Bulacan

bunga ng kalumpit ay malasa

nabatid ko iyon sa Balayan

sa Batangas, na tanim ng lola

kayraming pinangalan sa punò

tulad ng Apalit at Calumpit

na pangalan ay doon hinangò

kaya sa krosword, di na sumirit

- gregoriovbituinjr.

02.04.2025

* krosword mula sa pahayagang Pang-Masa, Pebrero 4, 2025, p.7

* apalit - punungkahoy (genus Santalum) na mabango, mula sa UP Diksiyonaryong Filipino, p. 65

Panaginip at alalahanin

PANAGINIP AT ALALAHANIN

madaling araw, madilim pa ang paligid

anong lamig na amihan ang inihatid

nagising sa gunitang di mapatid-patid

sa mata animo'y may luhang nangingilid

tila nalunod sa dagat, habol hininga

bunga ba iyon ng panaginip kanina

o iyon ay suliraning nasa dibdib na

habang sa isip may pag-asang nababasa

madaling araw, nais ko muling lumipad

na sa lupa mga paa'y di sumasayad

tawirin ang bundok o saanman mapadpad

habang natatanaw ang iba't ibang pugad

tahimik, dumaang awto lang ang maingay

bagamat dama sa puso ang dusa't lumbay

tanging nagagawa pa'y ang magnilay-nilay

at sa pagkatha ng kwento'y magpakahusay

- gregoriovbituinjr.

02.04.2025

Mas makapal ang balat ng trapo

MAS MAKAPAL ANG BALAT NG TRAPO

kaytinding banat ni Pooroy sa komiks
siya'y para ring environmentalist
endangered na raw ang mga buwaya
ngunit corrupt politicians ay di pa

balat daw ng buwaya ay makapal
magandang pangsapatos, magtatagal
mas maganda raw ang balat ng trapo
mas makapal, di pa endangered ito

kung babasahin mo'y pulos patama
di lang patawa, mayroong adhika
ang masapol kung sinong masasapol
marahil pati sistemang masahol

natawa man tayo ngunit mabigat
totoo sa buhay ang kanyang banat

- gregoriovbituinjr.
02.03.2025

* mula sa pahayagang Remate, Pebrero 3, 2025, p.3

Resign All!

RESIGN ALL!

dalawang pangunahing pinuno, panagutin!

nagbabalik sa alaala ang nakaraan

nang Resign All ay isinisigaw ng mariin

ng masang umaayaw na sa katiwalian

noon, tanda ko pa, patalsikin ang buwaya

papalit ang buwitre! kaya sigaw: Resign All!

ngayon, dalawang lider dulot sa masa'y dusa

ang dapat nang panagutin ng bayan: Resign All!

badyet para sa karapatan sa kalusugan

ay tinanggal umano, nilagay pang-ayuda

ng mga trapong nais manalo sa halalan

badyet ng bayan, ginapang daw ng dinastiya

pondong milyones, labing-isang araw lang ubos

pati confidential fund, di maipaliwanag

sa bayan kung paano ginamit at ginastos

bayan ba'y mananahimik lang? di ba papalag?

papayag pa ba tayong ganyan ang namumuno?

sa katiwalian na'y talamak at masahol

aba'y wakasan ang ganyang klaseng pamumuno

ay, ang sambayanan ba'y muling magpapabudol?

- gregoriovbituinjr.

02.03.2025

* litratong kuha ng makatang gala sa dinaluhang rali ng sambayanan sa Edsa noong Enero 31, 2025

Maganda ang kayumanggi

MAGANDA ANG KAYUMANGGI

maganda ba ang maputi?

kahit pangit ang ugali

pangit ba ang kayumanggi?

na kutis ng ating lahi

di tayo Amerikano

o kaya'y Yuropeyano

tayo nga'y mga Asyano

taga-Pinas na totoo

kaya bakit yuyurakan

ang ating balat, kabayan

kahit kutis natin naman

kayumangging kaligatan

ang kayumanggi'y maganda

lalo't dalagang morena

di ang maputing artista

na madrasta kung umasta

sa puti'y huwag mawili

lalo't mga mapang-api

baka tayo ay magsisi

pagsisisi'y nasa huli

- gregoriovbituinjr.

02.02.2025

Ang punò ng Elena ay Ipil

ANG PUNÒ NG ELENA AY IPIL

batid ko na noong ako'y bata pa

na ang puno ng Ipil ay Elena

narinig ko sa nayon ng Sampaga

sa Batangas, lalawigan ni ama

hanggang nakita sa palaisipan

nasa Dalawampu't Apat Pahalang

Punong Santa Elena'y katanungan

binilang ko, apat na titik lamang

akala ko'y santo, di pala, punò

aba'y Ipil ang agad kong nahulô

buti't salitang ito'y di naglahò

kaya krosword ay nasagot kong buô

sa palaisipan nga'y nawiwili

at utak ay nahahasang maigi

nilalaro ko sa araw at gabi

pag pahinga't libangin ang sarili

- gregoriovbituinjr.

02.02.2025

* palaisipan mula sa pahayagang Pang-Masa, Pebrero 2, 2025, p.7

Paglutas sa suliranin ng bayan

PAGLUTAS SA SULIRANIN NG BAYAN

kayraming suliranin ng bayan

na dapat mabigyang kalutasan

kayraming masang nahihirapan

pagkatao pa'y niyuyurakan

habang bundat ay humahalakhak

trapong ganid ay indak ng indak

oligarkiya pa'y nanghahamak

dukha'y pinagagapang sa lusak

dinastiya'y dapat nang lipulin

lalo ang oligarkiyang sakim

pati trapong ang ngiti'y malagim

kaya lipunan ay nagdidilim

organisahin ang manggagawa

sila ang hukbong mapagpalaya

uri silang sa burgesya'y banta

ngunit kakampi ng kapwa dukha

ganyang sistema'y di na malunok

ang dukha'y di dapat laging lugmok

ibagsak ang mga nasa tuktok

baguhin na ang sistemang bulok

- gregoriovbituinjr.

02.02.2025

Ang punò

ANG PUNÒ

kaysarap pagmasdan ng punong nadaanan

ang lilim niya'y pag-asang dulot sa tanan

marami siyang naitutulong sa bayan

malinis na hangin at bungang kailangan

halina't pagmasdan ang kanyang mga ugat

at tiyak, marami tayong madadalumat

anya, magpakumbaba kahit umaangat

anya pa, linisin ang basurang nagkalat

sa ilalim ng puno'y kaysarap magpulong

kasama ang dukhang sa hirap nakabaon

talakayin kung paano makakaahon

sa hirap o marahil ay magrebolusyon

ang puno ay kapara rin ng mga tao

bata pa'y inaalagaan nang totoo

hanggang magdalaga o magbinata ito

pitasin at kainin yaong bunga nito

halina't magtanim tayo ng mga punò

sa parang, sa kabundukan, saanmang dakò

at diligan natin ng tubig, luha't pusò

hanggang bagong kagubatan yaong mahangò

- gregoriovbituinjr.

02.01.2025

* litratong kuha ng makatang gala sa isang mapunong lugar sa UP Diliman

Lakad-lakbay

LAKAD-LAKBAY

oo, lakad lang ako ng lakad

kung saan-saan din napapadpad

lakad lang, pagninilay ang hangad

buti't di nasasagi ng awto,

ng dyip, bus, trak, taksi, motorsiklo

o ng anumang sasakyan dito

anong hirap kung magkakapilay

lalo't madalas tulalang tunay

dahil sa panay na pagninilay

kapara ko'y si Samwel Bilibit

di naman siya Samwel Bilibid

na sa Muntinlupa nakapiit

aba'y lakad lang sa pupuntahan

na ehersisyo na ng katawan

bilin sa sarili ay: Ingat lang!

- gregoriovbituinjr.

02.01.2025

* litratong kuha ng makatang gala sa lansangan palabas ng UP Diliman

Ang mga pakpak nina Daedalus at Icarus

ANG MGA PAKPAK NINA DAEDALUS AT ICARUS

kung nais mong maabot / ang langit sa paglipad

iwan ang mga bagay / na sa iyo'y pabigat

patibayin ang bagwis / upang sa pagpagaspas

ay di masira, baka / tuluyan kang bumagsak

may alamat nga noon / na batid ko pang lubos

hinggil sa kanaisan / ng amang si Daedalus

na gumawa ng pakpak / na talagang maayos

kasama'y kanyang anak / na ngalan ay Icarus

gawa ang pakpak mula / pagkit at balahibo

nais nilang takasan / ang piitan sa Creto

habang bilin ng ama'y / huwag taasang todo

ang paglipad, sa araw / matunaw na totoo

subaiit di sinunod / ni Icarus ang ama

sa taas ng paglipad / ay bumulusok siya

pagkat pagkit sa pakpak / ay natunaw talaga

at kamatayan niya'y / natamo kapagdaka

- gregoriovbituinjr.

02.01.2025

* litrato mula sa google