Dalawang Araw ng Puso

DALAWANG ARAW NG PUSO

Pebrero Katorse, Araw ng mga Puso

Setyembre Bente Nwebe, Araw din ng Puso

Una'y hinggil sa ating pagsinta't pagsuyo

Sunod, puso'y alagaan nang di maglaho

Una'y araw ng mga pusong nagniniig

Kung saan nadarama'y pintig ng pag-ibig

Sunod, pusong alaga'y di basta mayanig

Ng cardiac arrest kaya buhay pa'y lalawig

Di lamang pag-ibig kundi pangangatawan

Ang alalahanin nati't pangalagaan

Una'y batid bago pa magkaasawahan

Ikalwa'y pag nagsama na sa katandaan

Buhay pa rin tayo kapag puso'y nasawi

Sa atake sa puso'y dami nang nasawi

- gregoriovbituinjr.

02.12.2023

* February 14 is Valentine's Day

* September 29 is World Heart ❤️ Day

* litrato mula sa google

Sipnayan

SIPNAYAN

dapat pa ring di maging bantulot

sa aritmetika pag sumagot

at bakasakaling may mahugot

na iskemang sa diwa sumulpot

may numerong nakatagong sukat

kaya di maisiwa-siwalat

ngunit kung atin lang madalumat

ay parang babasaging may lamat

naririnig ko ang bawat hikbi

ng mga numerong inaglahi

di batid sila ba'y ngumingiti

sa kabila ng nadamang hapdi

ngunit sila ba'y numero lamang

gayong sipnayan ay nililinang

ang bilang nila'y di na mabilang

kapara'y gumagapang na langgam

- gregoriovbituinjr.

02.11.2023

* litrato mula sa pahayagang Pang-Masa, Pebrero 11, 2023, pahina 7

Pagninilay

PAGNINILAY

kaytahimik ng kapaligiran

may punong walang kadahon-dahon

tila nasa malayong silangan

alapaap ay paalon-alon

buti't nababahaw na ang sugat

habang sa kawalan nakatingin

ninais ko nang maisiwalat

ang pangyayaring di pa mapansin

hanging sariwa ang dumadampi

sa pisngi ko't pangang naninigas

tila nawala ang damang hapdi

ng loob kong nais nang mag-aklas

tahimik ngunit di pa payapa

pagkat loob pa'y tigib ng luha

- gregoriovbituinjr.

02.11.2023

Pagkalos

PAGKALOS

di man dalumat ang pangungusap

pagkat klima't sigwa ang kaharap

madadalumat din ang pangarap

kung pag-uusapan nating ganap

bakit patuloy ang pagdurusa

sa ating lipunan ng mayorya

wala bang magawa sa burgesya

at sa mga mapagsamantala

halina't dapat tayong magbuklod

upang pagbabago'y itaguyod

mag-usap, huwag basta susugod

mag-isip kung paano sasakyod

sa sistemang bulok na lumumpo

sa ating karapatang pantao;

maghanda sa pagsuong sa bagyo

at kalusin na ang mga tuso

na nagpapakabundat ngang sadya

sa binarat na lakas-paggawa

na di binabayaran ng tama

bundat silang talagang kuhila

dapat nang tayo'y magkapitbisig

at panawagan ay isatinig

upang ang mga tuso'y mausig

upang mga kuhila'y malupig

- gregoriovbituinjr.

02.11.2023

Liwayway

LIWAYWAY

kaysarap makatunghay

ng nobela, sanaysay

kwento'y mabasang tunay

sa magasing Liwayway

pagkat nananariwa

ang aking pagkabata

nahalina sa tula

at ngayon kumakatha

buti't may babasahin

tulad nitong magasin

na binibigyang-pansin

ang pagkamalikhain

dati ay linggo-linggo

bente pesos ang presyo

kada buwan na ito

at isangdaang piso

kahit na nagmahalan

ay sinusuportahan

pagkat ito'y lagakan

ng ating panitikan

baya'y di nagsasalat

kapag may nag-iingat

ng panitikang mulat

sa haraya'y dalumat

- gregoriovbituinjr.

02.10.2023

Ang isang kilong sibuyas

ang isang kilong sibuyas

ay para na ring alahas

pagkat ang ipinamalas

ay pagmamahal na wagas

- dalít ni gregoriovbituinjr.

02.09.2023

* ang dalít ay katutubong tulang may apat na taludtod at may sukat na walong pantig bawat taludtod

Sinuyo ang diwata

sinuyo ang diwata

sa langit hanggang lupa

alay na puso't diwa'y

tinangay na ng mutya

- tanagà ni gregoriovbituinjr.

02.09.2023

* ang tanagà ay katutubong tulang may apat na taludtod at may sukat na pitong pantig bawat taludtod

Tatlong pritong tilapya

TATLONG PRITONG TILAPYA

kahapon, bumili ako ng tatlong isda
nang sa buong maghapon ay ulam kong sadya
trenta'y singko pesos bawat pritong tilapya
madalas, ganyan ang buhay nitong makata

ang isa'y inulam ko na kinagabihan
isa'y pinagsamang almusal, tanghalian
isa pa'y iuulam mamayang hapunan
madalas, ganyan kaming tibak na Spartan

hahaluan ng sibuyas, bawang, kamatis
upang sa kagutuman ay di na magtiis
ganyan man, di kami pulubi sa dalisdis
kundi tibak, kalaban ng nagmamalabis

tatlong pritong isda sa maghapon, magdamag
basta iwing katawan ay di mangangarag
na sa pagkilos, patuloy na nagsisipag
nang sistemang bulok ay tuluyang malansag

- gregoriovbituinjr.
02.09.2023

Nilay sa usapang FDC sa ZOOM

NILAY SA USAPANG FDC SA ZOOM

proyekto nila'y di lapat sa lupa

at naroon lang sa mga bathala

ang tao'y pinagwawalangbahala

ng uring kapitalista't kuhila

ano bang nararapat nating gawin

nang mga pader na ito'y banggain

ang sama-samang pagkilos ba natin

ay sapat upang sistema'y buwagin

RCEP at iba pa'y pangkanila lang

silang sa daigdig ay mapanlamang

ang globalisasyon ng mga dupang

ay paano nga ba mapapalitan

ilang nilay sa talakayan sa zoom

laban sa sistemang dulot ay gutom

nakikinig habang kamao'y kuyom

at bibig ay di dapat laging tikom

- gregoriovbituinjr.

02.09.2023

Uno

UNO

sa larong sudoku'y matalim ang pagkakatitig

tila idinuduyan sa madilim na daigdig

animo'y dinarama pati malalim na pintig

parang nakaalpas sa malagim na pagkayanig

isang numero na lang at buo na ang sudoku

numero uno ang isulat sa siyam na blangko

linya pababa't linya pahalang ay sagutan mo

dapat sa bawat linya'y walang parehong numero

minsan, pag nakita sa pahayagan, matutuwa

na sa bawat isyu'y isa lang ang nalalathala

mabuti na lang, may app na sudoku na nalikha

kaya nagsusudoku sa selpon pag walang gawa

kayhusay ng nag-imbentong nag-isip nang malalim

anang iba, sa SUnDOt-KUlangot ito nanggaling

sinakluban ng patpat ang binilot na pagkain

makunat, matamis, tingnan mo't ito'y siyaman din

isang larong nakapagbibigay ng kasiyahan

upang sa pagkasiphayo'y makawala rin minsan

habang nagninilay ay hinahasa ang isipan

sa larong itong kapaki-pakinabang din naman

isulat mo na ang uno, huwag nang patagalin

pag nabuo, may susunod pang larong sasagutin

pag gutom ang diwa'y ito ang aking kinakain

pag nadama'y kasiyahan, nakabubusog na rin

- gregoriovbituinjr.

02.09.2023

Sa tinapayan

SA TINAPAYAN

habang madaling araw pa lang

naroon na sa tinapayan

gusto'y mainit na pandesal

at kape para sa almusal

laging maaga kung humimbing

at madaling araw gigising

upang maabutan ngang sadya

ang bagsakan sa talipapa

at bibili roon ng mura

dadalhin sa tindahan nila

na pag ibinenta'y may patong

upang sa kita'y may pandugtong

ganyan ang araw-gabing buhay

sa tinapayan na tatambay

- gregoriovbituinjr.

02.09.2023