Pi

PI

numero iyong agad nakita

at PI ang sagot ko kapagdaka

na numerong pamilyar talaga

dahil mula sa matematika

PI ang rata ng sirkumperensya

ng bilog sa diyametro niya

ang PI ay kilala nang pormula

sa matematika at pisika

PI ay mula sa letrang Griyego

titik P ang kahulugan nito

ginamit dahil sa Perimetro

ng bilog, mabuti't nabatid ko

ang nagkalkula'y si Archimedes

isip ay magaling at makinis

si William Jones naman ang nagbihis

nitong PI sa makabagong tesis

nang sa krosword ito'y madalumat

ay PI ang agad kong isinulat

tangi kong masasabi'y salamat

dahil PI ay muling nabulatlat

- gregoriovbituinjr.

04.14.2023

Tangi kong handog

TANGI KONG HANDOG

patuloy kong mamahalin ang tanging irog

kahit pa ang aking araw na'y papalubog

patuloy kaming mangangarap ng kaytayog

at abutin ito habang kami'y malusog

pisngi ko man ay payat na't di na pumintog

at ang mangga'y manibalang pa't di pa hinog

siya'y rosas pa rin at ako ang bubuyog

na iwi kong pag-ibig ang tangi kong handog

- gregoriovbituinjr.

04.14.2023

Felicisimo Ampon, Pinoy tennis champ

FELICISIMO AMPON, PINOY TENNIS CHAMP

magaling na tennis player mula sa Pilipinas

si Felicisimo Ampon, dakilang manlalaro

medyo kaliitan man siya'y kanyang pinamalas

kung gaano kagaling ang Pinoy sa buong mundo

naging kinatawan siya ng bansa sa Davis Cup

sa loob ng sinasabing halos tatlumpung taon

natamo niya'y mga medalya sa pagsisikap

na dalhin sa rurok ang bansa't makilala roon

sa Far Eastern Games ay nakamit ang tennis gold medal

sa Pan American Games ay tennis singles gold medal

sa Asian Games natamo ang tennis doubles gold medal

sa Chinese Open Tennis ay doubles title ang medal

ngalang Felicisimo Ampon, dakilang atleta

ay ating tandaan, itaguyod ang larong tennis

sumusunod sa yapak niya'y isang dalagita,

si Alex Eala, mahusay, di basta magahis

tandaan natin ang ngalang Felicisimo Ampon

magaling na atleta, taospusong pagpupugay

sa ating bansa, alamat na siya't inspirasyon

O, Felicisimo Ampon, mabuhay ka! Mabuhay!

- gregoriovbituinjr.

04.13.2023

* litrato mula sa fb, daghang salamat, ctto

Araw at buwan sa lumang kalendaryo

ARAW AT BUWAN SA LUMANG KALENDARYO

nang masaliksik ang El Calendario Filipino

sa Apendice J ng disyunaryong Cebuano

may lokal palang katumbas ang buwan ng Enero

hanggang Disyembre, pitong araw din ng buong linggo

Tagurkad ang araw ng Linggo, Damason ang Lunes

Ligid ang Sabado, Dukotdukot naman ang Martes

Baylobaylo ang Miyerkules, Danghus ang Huwebes

habang Hingot-hingot naman ang araw ng Biyernes

Ulalong ang Enero, Dagangkahoy ang Pebrero

buwan ng Abril ay Kiling, Dagangbulan ang Marso

Himabuyan ang Mayo at Kabay naman ang Hunyo

Dapadapon ang Hulyo, Lubadlubad ang Agosto

tinawag na Kanggorasol ang buwan ng Setyembre

habang Bagyobagyo naman ang buwan ng Oktubre

Panglot Ngadiotay naman ang buwan ng Nobyembre

habang Panglot Ngadaku yaong buwan ng Disyembre

Miyerkules at Oktubre ang kapanganakan ko

taon ng Unggoy, ka-birthday ni Gandhi, October two

may rima ang araw at buwan nang isilang ako

araw ng Baylobaylo at buwan ng Bagyobagyo

kalendaryo kayang ganito'y ating pausuhin

upang maitaguyod ang sariling wika natin

at isulat din ito sa katutubong Baybayin

unang hati pa lang ng taon, at kaya pang gawin

- gregoriovbituinjr.

04.13.2023

* litrato mula sa fb, daghang salamat, ctto

Sa silid

SA SILID

umulan ng madaling araw

kaya ngayon ay giniginaw

na sa buto ko'y humahataw

kailangang gumalaw-galaw

pagkat amihan ang hinatid

sa kalamnan ay sumisigid

pumapasok dito sa silid

sa lamig ka ibinubulid

kanina ako na'y nahimbing

nakakumot, pabiling-biling

sa panaginip ko'y hiniling

na ang diwata'y makapiling

subalit nagising sa lamig

katawan ay nangangaligkig

diwata sana'y makaniig

na kukulungin ko sa bisig

sa puyat ay nananatili

nais ko pang matulog muli

ngunit ginaw ang humahati

sa buong silid naghahari

- gregoriovbituinjr.

04.13.2023

Paniwang

PANIWANG

paniwang ang tawag sa panlinis ng palikuran

na dati-rati'y basta pangkuskos ang tawag riyan

ngayon, may Sinaunang Tagalog pala - paniwang

na nais ko na ring gamitin sa kasalukuyan

tinatawag ko ngang "yung pang-ano" sa C.R. noon

kumbaga sa kaldero, iyon 'yung pang-isis doon

sa kasilyas, panlinis sa dingding ng C.R. iyon

at sa inidoro, nang pumuti ang loob niyon

kung 'pansuro' ang dustpan, na sa kwento'y nabasa ko

ang 'paniwang' naman ay magagamit ding totoo

habang itinataguyod ang wikang Filipino

sa mga tumutula at nagsusulat ng libro

gamitin din natin sa katalamitam na madla

pahiram ng paniwang, gagamitin ko pong sadya

lilinisin ko lang ang palikurang anong sama

umitim na sa dumi ang kubetang napabaya

kukuskusin ko ang mga dingding nitong paniwang

sa inidoro, ibabaw, ilalim, pati siwang

maiging linisin, paputiin nang walang patlang

nakakapagod man ay gawing parang naglilibang

- gregoriovbituinjr.

04.12.2023

* mula sa UP Diksiyonaryong Filipino, p. 927

Makabagbag-damdaming editorial cartoon

MAKABAGBAG-DAMDAMING EDITORIAL CARTOON

kaygandang dibuho sa editorial cartoon

na naglalarawan sa nangyayari ngayon

ganyan ang editoryal na ang nilalayon

madla'y magsuri bakit nagaganap iyon

ang iginuhit ay makabagbag-damdamin

dahil nasasapul ang diwa't puso natin

isang tao'y naroong yakap-yakap man din

ang isang kabang bigas na nagmahal na rin

"Ang mahal mo na" ang namutawing salita

sa harap ng kabang bigas na minumutya

at ako bilang mambabasa'y naluluha

sa katunayang nagpapahirap sa madla

nahan ang sangkilong bente pesos na bigas

na pinaniwalaang dala'y bagong bukas

ngunit pangakong isa lang yatang palabas

na parang pelikulang iba ang nilandas

pag inunawa mo ang kaygandang dibuho 

parang patsutsada sa napakong pangako

panibagong kalbaryo na nama't siphayo'y

daranasin ng madlang laging sinusuyo

- gregoriovbituinjr.

04.12.2023

Tibuyô

TIBUYÔ

tingni't naririto ang munti kong tibuyô

na hanggang ngayon ay di ko pa napupunô

sinusuksukan ko lagi ng tigsasampû

na barya, pati na bente pesos na buô

nawa'y mapunô ko ito sa Mayo, Hunyo,

Hulyo, Agosto, o kaya'y bago mag-Pasko

akin namang ilalagak ito sa bangko

o kaya'y bibili ng pantalon at libro

sa mga diksyunaryo, tibuyô pa'y wala

ngunit batid na ito nang ako pa'y bata

pagkat si Ama'y ito ang sinasalita

alkansya'y tibuyô sa Batangas na wika

iyon ngang hawot ay nasa diksyunaryo na 

maging ang tuklong na isang munting kapilya

nawa tibuyo'y mailagay din talaga

kawayan man o bao'y talagang alkansya

kinasanayan kong sa tibuyô mag-ipon

kahit barya-barya, lalagô rin paglaon

nang kami ni misis ay makapaglimayon

sa Tokyo, Berlin, Paris, o New York man iyon 

- gregoriovbituinjr.

04.12.2023

GISIKABA

GISIKABA

(GInisang SIbuyas, KAmatis, BAwang)

niluto ko'y ginisang sibuyas, kamatis, bawang

upang maiulam ko mamayang pananghalian

aba'y masyado na raw akong nagbe-vegetarian

sabi ko'y hindi, ako lang ay nagba-budgetarian

nagawan ko pa ito ng daglat na GISIKABA

na tila nagtatanong ng ganito: Gising Ka Ba?

lalo't madaling araw pa lang ay nagigising na

kaya ramdam pa ri'y puyat paggising sa umaga

inalmusal ay pianonong naiwan ni misis

na dapat ay binaon niya sa kanyang pag-alis

ngayong pananghalian, uulamin ko'y kamatis,

bawang, at sibuyas, na ginisa kong anong tamis

GISIKABA? baka naman itanong mo sa akin

ang sagot ko, aba'y oo, iyan ang uulamin

tara, mag-GISIKABA, ako'y saluhan mo na rin

lalakas pa ang katawan sa ganitong gulayin

- gregoriovbituinjr.

04.12.2023

Pianono

PIANONO

naiwan ni misis ang kanyang pianono

naiwan? o iniwan nang buong pagsuyo?

anong meryenda niya pag siya'y nahapo?

ganito ang naisip habang nagluluto

tanong sa isip, bakit naiwan ay tatlo

ang ibig bang sabihin niyon ay "I love U"

kaytamis ng pianono nang kinain ko

kaysa masira, bibili na lang ng bago

animo'y pagsintang kaytamis ng tinapay

na sadyang magpapangiti sa iyong tunay

kaya loob ko't isip ngayon ay palagay

habang ginagawa ang tungkulin at pakay

naiwan ba o iniwan? di ko masagot

sa lambing ni misis, ako'y di nalulungkot

sa pianono pa lang, panay yaring hugot

at kinain iyon nang walang pahintulot

- gregoriovbituinjr.

04.12.2023

Umaga

UMAGA

sumalubong ang umagang maaliwalas

habang nagising sa ibong huni'y kaylakas

sa iwing diwa'y may kung anong nawawatas

na sa anyo ng mukha'y iyong mababakas

kinain ang bahaw na kagabi niluto

upang tanggalin ang gutom at pagkahapo

isinulat kaagad upang di maglaho

ang mga nasa isip ng buong pagsuyo

sa guniguni'y may lumalambi-lambitin

kaagad uminom ng tubig nang mahirin

tila may kung anong mga alalahanin

na dapat suriin, pag-isipan, lutasin

umiikot ang buhay habang gumagawa

nagkakayod-kalabaw habang naghahanda

sa bukas ng pamilya habang tumatanda

kayganda ng umaga habang kumakatha

- gregoriovbituinjr.

04.12.2023